مش ناوى ترجع (اغنيه من كلماتى )

تفوت ليالى ورا ليالى
وشوقى ليك يزيد يا غالى
وانا كل ليله بستنى ترجع
وانت مش حاسس بحالى
بعدك انا مبقتش انا
ونسيت بجد طعم الهنا
وكل لحظه فى البعد توجع
وتفوت عليا زى السنه

مش ناوى ترجع ولا ايه ارجع حبيبى مستنى ايه هو انت خلاص فى البعد ارتاحت رد عليا ساكت ليه


فاكر زمان وسنين زمان
فاكر ايامنا واللى كان
وازاى هتنسى كل ده
وانت اللى قلبك عمره ما خان
مش قولتلى ..ووعدتنى
وأزاى احب ..علّمتنى
خليك معايا لحسن كده
هموت بجد لو سيبتنى

مش ناوى ترجع ولا ايه ارجع حبيبى مستنى ايه هو انت خلاص فى البعد ارتاحت رد عليا ساكت ليه


ياريت اعرف رأيكم

تبيع بكام عشان في واحد مغني معرفة بيغني في مطابخ وكده كان طالب اكتبله اغنية ها بكام ؟؟؟

35 الف جنيه

عند أمه يا ادهم

لعلمك يانشوان انت متواضع جدا المفروض تتطلب بالضبط 5 قروش وثلاثة ارباع القرش شوف انا مكرمك فى 4 قروش اهو حق الصحوبيه اللى بينا
بس بصراحة الاغنية جامدة اوى

دى احلى حاجه( مش ناوى ترجع ولا ايه ارجع حبيبى مستنى ايه هو انت خلاص فى البعد ارتاحت رد عليا ساكت ليه)
وبصراحه كلها حلوة لانها كفايه انها بتعبر عن احساسك

شكرا على ذوقك وردك الجميل

حلوة قوى
ايه يا عم الاحساس ده

حلوه اوي بس الرد جيه ماخر اوي اصلي لسه شايفاها

انا اول مره اشوف الموضوع ده
كان فين من زمان

المهم سيبك من مرتضى
وهاتلى الاغنيه دى هديها لعمرو دياب يغيها فى الالبوم القادم بعد اربع سنين

شكرا على الردود الجميله دى
وبجد مش عارف اقولكم ايه
اخجلتم الواحد وانا اصلى وش كسووووووووووووف ع الاخر