رحله الزمالك فى كوكب الفشل

المكان : إستاد القاهرة ( الحمد لله لعبنا علي أرضنا )
الزمان : 4 مارس 2009 ( لازم يعملوا عيد الصبر في اليوم دا )
الحدث : الزمالك يفوز علي إنبي ( عادي طول عمرنا بنكسب ...إهئ إهئ )

بتقول إيه !! ....... هييييييييييييييييييييييييه

( المشجع الغلبان يمزق الكفن وينهض وهو في قمة النشوة)

لأ وفاز آداء ونتيجة وحط تحت آداء ونتيجة دي من 20 إلي 40 خط

الناس فايقة واللعيبة رايقة

إيه دا ؟ مش هم هم ؟

أيوة طيب إيه اللي حصل ؟

أقولك ياسيدي ( حط حصوة في عينه وإبتدى في الكلام ) :

1- الزمالك لعب لأول مرة 11 لاعب عشان جمال حمزة والحمد لله مصاب كأن لو كان سليم بيجري 3 كيلومتر علي بعض !! ( ملحوظة : نيدفيد 33سنة بيجري 12 كيلومتر في المباراة ) مابالكم بواحد عمره ماجاله شد عضلي عشان مابيجريش أصلا !!

2- الزمالك دخل المباراة بفكر جديد ألا وهو اللعب بمركز جديد ظهر في الكورة الأوروبية إسمه ( باك شمال مش أبو العلا ) - يارب مايشوف الملعب تاني بعينيه

3- الزمالك لم يلعب بشيكابالا ودا في حد ذاته شئ كويس لإن الولد لما كان بيلعب كان كل الناس بتحمل عليه ( إجري ياشيكابالا ..باصي ياشيكابالا ...رقص ياشيكابالا ...دافع ياشيكابالا ... إعمل عجين الفلاحة ياشيكابالا .. إيه دا ماقدرتش طيب ( لفظ جارح ) وتعالى ) فعدم لعبه يخلي الناس تسيبه يركز ويلعب لعب جماعي و زي ماعلمونا في الإبتدائي اللعب الجماعي يرتقي بالآدء الفردي ( حقيقة علمية )

4- بالنسبة للأول والتاني أتمنى من قلبي وبكل جوارحي وعواطفي الجياشة والمتحاشة ناحيتهم إن الموسم دا يكون الأخير لهم لإنهم ماتوا إكلينكيا من 3 مواسم وبيلعبوا علي أيام الذكرى الفينجادية و من قبلها الأوتوفسترية ..باي باي ممكن أقبلكم كجمهور وبقول ممكن ماتعتبروش دا وعد

5- عدم إنتظار المكسب من ناحية الجمهور ( شئ طبيعي ) خلي الأولاد في الملعب يلعبوا بثقة زي قولة مش فارقة ياصابت يا إتنين عور فلعبوا بهدوء أعصاب والجمهور شاكرا لم يوجه لهم شتائم يعاقب عليها القانون

6- الجمهور اللي إستحمل الفرقة بعد ماوصلت للشكل المهين لازم ياخد جايزة نوبل في الصبر , لإن بقية جوائز أحسن جمهور علي مستوي السديم الكوني محجوزة لجمهور القافلة الحمراء

رسائل قصيرة :

عبد الحليم علي : لو فاكر إن إنت هاتضحك عليا وعلي الناس البريئة وتفهمنا إن فيك رمق تلعب موسم كمان تبقى غلطان أرجو أن يكون الموسم ده هو الأخير

صبري رحيل : أشكرك بكل مافي الكلمة من معنى ولا يكلف الله نفسا إلا مافي وسعها

أحمد الميرغني : كأني بمكاليلي مصري أرجوك أستمر

علاء علي : إنت بتلعب بمزاج عالي و دا رغم إنه كويس بس بيفكرني بالمغفور له ( عمرو سماكة ) فأرجو ان لا تكون علي نفس الطريق .... وإنت فاهمني كويس

عمرو عادل : لو لعبت كذا ماتش مستواك هايعلى لكن المشكلة إن إحنا في وقت الغلطة بتودي المظاليم !!

محمد عبدالله : لو سبت الكورة هي اللي تحركك مش إنت اللي إنت اللي تحركها هاتبقي لعيب عالمي بس واضح إن الكلام لايفيد

يا عم الحج كفايه حرام عليك هو الزمالك ناقصك
وبعدين ده انا نفسى تعبت للزملكاويه
ارحموا من فى الارض يرحمكم من فى السماء

ما هما اللى بيتغلبوا على طول
لما يفوزوا يبقى نشيد بيهم