عيش ندل

موضوع: عيش ندل الأحد أغسطس 30, 2009 10:00 pm

من الأمثال الشبابية اللى انتجها جيل الروشنة اللى للاسف بنتمى ليه,(عيش ندل تموت مستور) .
يعنى الجيل الجديد اكتشف انه عشان يقدر يعيش مرتاح من غير وجع دماغ ومشاكل لازم يكون شعاره
انا ومن بعدى الطوفان
خراب يا دنيا عمار يا دماغى
والكلمة المأثورة الاخيرة للفنان (نجاح الموجى)الله يرحمه,ايكش تولع.
يعنى لا اهلى ولا اصدقائى ولا حد فى الدنيا يهمنى
فلتسقط شعارات التضحية والحب والعطاء .
ولنرفع جميعاً شعار(الندالة للجميع).
برجع بالذاكرة لايام الطفولة والصبا افتكرت جملة كنت بسمعها كتير جدا بس
للاسف ولا مرة اهتميت بيها يمكن لو كنت اهتميت كان حالى اتغير.
كانوا زملائي يقولولى بصراحة انت ولد كويس جدا بس عيبك انك طيب!!!!!!!!
تصوروا الطيبة بقت عيبة,دى احدث النكت البايخة.
بصراحة بينى وبين نفسى قعدت افكر فى نفسى لقيتها اتظلمت معايا كتير وقررت اجرب الندالة , بس قولت ابدأها مع مين؟
أمى؟لا مايصحش
ابويا؟لا عيب
اخواتى؟لا مش معقول
قرايبى؟لا برضه عيب
اصحابى؟ماقدرش
طيب مافيش غير الاغراب عنى ابعد عن اهلى واجرب الندالة فيهم بس رجعت افكر لو ماليش خير فى اهلى مش هيبقى ليا خير فى الاغراب.
بصراحة اكتشفت انى مش هعرف اكون ندل دى حاجة بتتولد جوه الانسان زى قلبه
وتفضل تكبر مع كل سنة من عمره لحد ماتبقى حاجة كبيرة ومكلكعة ومن الصعب
جدا استئصالها.
وافتكرت كلام الحبيب محمد عليه الصلاة والسلام(المؤمن للمؤمن كالبنيان المرصوص يشد بعضه بعضاً)
وكلام المولى جل فى علاه(ادفع بالتى هى احسن فاذا الذى بينك وبينه عداوة كأنه ولى حميم)صدق الله العظيم
وبعدين هى الدنيا ناقصة اندال؟دى فيها اللى مكفيها وزيادة.
وفى النهاية اهديكم شوية نكت عن الندالة اتمنى تعجبكم:-

واحد ندل جورج قرداحي اتصل بيه وقال له معنا صديقك وصل >>نصف مليون>> ريال محتاج مساعدتك قال: قل له نايم

مرة واحدة ست بتقول لجارتها
الحقيني يا أم محمد بعت جوزي يجيبلي ملوخية راح مخبوط بأتوبيس …
يالهوي وعملتي إيه …
عملت بامية وأمري لله

واحد ندل عينوه مدير المطافي غير النمرة من 123 عملها 567309261046574852

.

موضوع: رد: عيش ندل الأحد أغسطس 30, 2009 10:11 pm

صباح النداله

موضوع: رد: عيش ندل الإثنين أغسطس 31, 2009 8:31 am

انا ومن بعدى الطوفان
خراب يا دنيا عمار يا دماغى
هما دول احسن مثلين واللي المفروض نمشي عليهم عشان نعيش

موضوع: رد: عيش ندل الإثنين أغسطس 31, 2009 7:54 pm

ههههههههههههههههههههههههههه