هل تظن بان من يحبك يفكر بك كما تفكر به؟

]هل تظن ان من تحب يفكر بك كما تفكر به؟؟؟؟؟؟؟


سؤال محير شويا...................

هل تظن بأن من تحب يفكر بك كما تفكر به أنت الآن؟

شعور جميل، عندما تسافر بك أفكارك بعيداً حتى تتيه معها بين خلجات قلبك، هناك حيث لا يستطيع أحد الوصول إلى
ذلك المكان سوى خالقه، ولا يستطيع أحد أن يسكن فيه سوى من تحب، ترى عيناك أناس كثيرون حولك، ولا يرى قلبك أحداً منهم سواه،
تحس بأنه أنفاسك التي تعيش بها، ونبض قلبك الذي تحس بها، ودفئ دمك الذي يجري في عروقك ..
تجد الأوقات طويلة وأنت بعيد عنه، وقصيرة وأنت بقربه
يمر الوقت وأنت على حالك تلك .. تستعرض شريط حياتك بين عينيك .. فلا تجد فيه أحد يستحق الذكر سواه .. نعم هو ولا
احد سواه .. هو الوحيد الذي إذا مرت بك ذكراه تتمنى بأن يتوقف الزمان .. لتبقى معه .. أنت وهو فقط .. تستشف
عذوبته، ورقته، وجمال روحه، تتمنى وقتها لو كنت قادر على تغيير أحداث حياتك .. لتكون كلها معه .. ولترسم لنفسك
معه طريقاً جديداً يملئه الحب والشوق و الدفء .. وقتها لن تحس إلا بزفرة تخرج منك تكاد تمزق صدرك .. وعندها ينقطع
حبل أفكارك تلك على صوت منادٍ يهتف باسمك 0
ومما سلف ذكره عن تلك اللحظاات الجميله
هل تظن بأن من تحب يفكر بك كما تفكر به أنت الآن؟ وفي هذه اللحظات؟

بجد موضوع فوق الرائع
على الاقل بالنسبالى انا علشان بجد القضيه ديه تشغل بالى جدا حاليا
ميرسى جدا يا نونا
وتسلم اديكى

ربنا يخليك

بس انا حابه اعرف رايكم يعني فعلا
لما انت بتفكر في الشخص اللي انت بتحبو هوا بيفكر بيك ولا مش دايما؟

اكيد انا لما بحب وحده او اعجب بيها
بتمنى انها برده تفكر فيا

هيبقى دايما لو الاتنين بيحبو بعض قوى او بمعنى اخر حب حقيقى

بس لو كان من طرف واحد هيبقى التفكير قوليل

وميرسى تانى ليكى على الموضوع الجميل ده

سلااااااام

شكرا لردك

انا برضو شايفه ان اللي بيحب حد وبيفكر فيه علطول الطرف التاني اكيد

بيحس بكده

وخصوصا لو كان ده حب حقيقي يعني لو حد فيهم كان مضايق او تعبان الشخص التاني

بيحس بيه بس ده مش دايما هوا ممكن يكون موجود بس بنسبه قليله

اكيد طبعا هيحس بيه
لان الشخص اللى بيحب ده
بيخاف على اللى بيحبه وبيعوز يطمن عليه ويشيله جواه قلبه
اكيد لازم يحس بيه
طيب ممكن سؤال يا نونا؟

طيب لو بعد كل ده محسش بيه ؟
انتى عارفه العذاب اللى هيشوفه بجد عذاب ملهوش دواء

سورى على الاطاله

ما هي ده المشكله علشان كده انا كنت عاوزه اعرف ردكم

لاني الواحد مش لازم دايما يصدق ان الشخص اللي هوا بيحبو

لازم يفكر فيه او حتى يحس بيه


ده قليل اوي انا شايفه ان دلوقتي نادر جدا لما بتلاقي حد انت بتحبو بيفكر فيك وبيحس بيك لما بتكون تعبان او مضايق
مش شرط يكون حبيبك او حببتك ممكن حد من اصحابك

مش عارفه ده ليه ؟


يمكن لان الناس دلوقتي مبقتش بتحب بعض زي الاول ولا علشان الناس

كلها هما نفسها بس

اكيد محدش هيلاقي الاجابه

لا انا عندى اجابه

لان محدش خلاص بيأمن بحاجه اسمها حب صدقنى
ماعنه والله العظيم لسه موجود

بجد احساس فظيع لما بحب حد وانا عارف انه على الاقل مش بيفكر فيا
احساس صعب قوى
وده كله علشان بيقولو خلاص مفيش حاجه اسمها حب

يارب تكون هى ديه الاجابه

طبعا مفيش حاجة اسمها حب
الحب ده كان زمان ايام عبد الحليم

مفيش بنت تستاهل كلمة بحبك

ايه اللي هتستفيده لما تقعد تحب وبعدين ميكونش فيه اي مقابل لحبك ده ولا حتي مجرد احساس
ومش لازم يا نونا لما واحد يكون بيحب حد ويفكر فيه يبقي التاني بيحس بكدة... انا مجرب
ههههههه.." لو مضايق او تعبان "... محدش يقدر يحس المه وتعبه ده خالص غير اللي فيه الالم .
مش شرط يا حريشي يخاف عليه ويبقي عايز يطمن عليه ..المهم عنده نفسه وبس ومش مهم الباقي..ده اللي بيحصل دلوقتي

عارف انا العذاب اللي بتقول عليه ده يا حريشي

عارفة بقي ايه اللي نادر يا نونا .. ان يبقي في بنت تستحق اصلا ان اي واحد يحبها... وان البنت تفكر في الولد 1/10000000 من تفكير الولد للبنت

سوري ع الاطالة بس الموضوع شدني شوية

انا كالعاده مختلف معاك يا حماده
مينفعش نقول الحب مش موجود وده كان ايام عبد الحليم حافظ والكلام ده
وانا اسف بس انا بكلمك كصديق ولو انى معرفكش اوى
بس صدقنى مش معنى انك حبيت حد ميستاهلش او انك حبيت حد وهو مكنش بيحبك
ده معناه ان الحب مش موجود لأ ده موجود والدليل انك حبيت
صدقنى احنا ممكن نكون بنحب فى غلط او بنحب الشخص الغلط او فى ظروف غلط لكن عمر الغلط ما بيبقى فى الحب نفسه
ومفيش حاجه اسمها تستفيد ايه لما تحب حد وه مش حاسس بيك
لانك مش بتحب علشان تلاقى مقابل من حبيبك
انت بتحب وخلاص واعتقد ان فى ناس كتير بتحب وهى عارفه ومتاكده ان حبيبها بيحب غيرها , مسألتش نفسك ليه الواحد بيحب حد بيحب غيره
انت مش بتحب بمزاجك ولا بتبطل حب بمزاجك ده غصب عنى وعنك
واسف على الاطاله
بالنسبه لموضوع نونا
انا شايف ان مفيش اى ضمان او دليل على ان لو حد بيحب حد وبيفكر فيه التانى هيبقى بيفكر فيه بردو
الحكايه دى ملهاش قوانين يعنى مش لكل فعل رد فعل
انا بفكر فى اللى بحبه علشان انا بحبه وانا لو عارف انه بيحبنى ومتاكد من ده هبقى متأكد انه بيفكر فيا
بس ده رأيى وشكر على الموضوع

انا برده مش اتفق معاك يا حماده

انا جربت العذاب ده برده وجربته بشده

بس مخلنيش اكره الحب الحب ده اجمل حاجه ممكن انا اتسرعت انا حبيت غلط زى ما نشوان قال بس لسه فى حب وحب حقيقى كمان

ميرسى

سلاااااااااااام

بص يا حماده هم كلمتين هقولهوملك

ممكن تقول ان قليل البنات اللي ممكن تحب بجد

بس صدقني لو بنت حبتك بجد هتفكر فيك اكتر مما انت هتفكر فيها 100 مرة

لان البنت ما هي الا عاطفة

تحياتي حماده بك ،،،،،،

كلام جمميل اوى يا مرتضى
تسلم ايديك

شكرا لردكم على الموضوع

انا عجبني اوي كلام
sad love story

بس انا مش معاك يا حماده في الكلام اللي انت بتقولو خالص يعني ايه الحب ده كان في زمن عبد الحليم

البنت لما بتحب بتحب بجد واكتر من الولد كمان زي ما احمد قال

بس يمكن الزمن بتاعنا ده الحب اللي بجد قليل اوي وكمان برضو قليل ان في قصه حب بتنتهى نهايه سعيده

علشان كده حماده قال ان الحب مش موجود دلوقتي


البنت بس محتاجه ان الشخص اللي بيحبها يثبتلها حبو ده ويكون انسان جد معاها في كل حاجه

ومش يكون مجرد عاوز يعيش معاها يومين او حتى شهرين وخلاص وبعد كده يدور على وحده تانيه


لانو زهق منها...............



احنا لو اتكلمنا في موضوع الحب ده مش هنلاقي برضو كلام يقدر يقنع كل واحد فينا

هههههههههههههه
عندك حق يا نونا
بس بجد موضوع جميل وتستحقى الشكر عليه

الموضوع فعلا تحفة جدا
ودى اول مشاركة ومساهمة ليا ف المنتدي وفعلا هو منتدى لذيذ ومواضيع حلوة

شكرا ليك

واهلا بيك في المنتدى

انا بقى ليا راى


انا بعتقد ن الحب الحقيقى الموجود بشبة مستحيل الايام دى وكل 100 قصة حب منهم واحدة حقيقة

هقولك انا مجرب الاحساس دة بجد الحب الحقيقى دة انت بتفكر ف حببتك كتير لكن البنت الل بتحبها بتفكر فيك اكتر منك كمان ممكن تحلم نفس الحلم بتاعك تقولو نفس الكلمة فى وقت واحد تحس بحبيبك قبل ماينطق اى كلمة تحسة وهوة مضايق حتى لو موضحلكش ضيقة تحسة وهوة زعلان تحسة وهوة فرحان لان الحب دة بجد بيخلى الشخص مرتبط وجدانيا قبل عاطفيا بتحس انك انت وحبيبتك واحد او جسمين بقلب وروح واحدة عارفين زىة التوام اما واحد يتعب او يعيط التانى يحس بية بجد الحب دة شئ جميل اما يكون فعلا انت تستاهل الحب دة وتستاهل ان البنت دى تتضحى باى حاجة علشانك وهية كمان لازم تكون تستاهل حبك ومش محسساك انك ولا حاجة وبسهولة تتضيعك


بص يا حمادة فى حب بس هقولكم جملة عجبتنى اوى سمعتها من اسامة منير لو بتحبوة يعنى

مش كل حب اسمة حب . وجملة تانية

الحب عمل ليس قول .. وجملة تالتة

الحب كالعسل لو زودت فية ينقلب ضدك مش هتحس بية اوى زى ما بتاكل كمية عسل ولو اديت منة لحبيبتك بس بكمية معينة يعنى هتحس انة اجمل احساس

وعلى راى اليسا (( اجمل احساس ف الكلون انك تعشق بجنون )) اسف ع الاطالة بس حبيت اقول الل جوايا

كلام جميل يا عمرو اوى تسلم اديك

بس انا اخالفك فى الجمله اللى انت قولتها
" انا بعتقد ن الحب الحقيقى الموجود بشبة مستحيل الايام دى وكل 100 قصة حب منهم واحدة حقيقة "
اه اغلب اللى بيحصل دلوقتى مش حب حقيقى
بس برده فى حب حقيقى ومش يوصل لدرجت المستحيل صدقنى

ده رأيى برده حبيت اقوله
سورى على الاطاله

سلاااااام